Íslenska og Google: beygingar, stafir og hvernig fólk leitar í alvöru

Flest ráð um leitarvélabestun eru skrifuð fyrir enskan markað með milljónum leita. Íslenskur veruleiki er annar: fá leitarorð, flókin beygingafræði og notendur sem leita á tveimur tungumálum.

Beygingar

Google skilur að vefsíða, vefsíðu og vefsíðum eru sama orðið. Skilningurinn er samt ekki fullkominn á íslensku, því gagnamagnið er lítið miðað við ensku.

Hagnýta reglan: skrifaðu eðlilegan texta þar sem orðið kemur náttúrulega fyrir í mismunandi föllum. Ekki þvinga nefnifall inn í setningar þar sem það á ekki heima. Klaufalegur texti tapar bæði lesendum og trausti, og vinnur ekkert til baka í röðun.

Íslenskir stafir

• Í texta, fyrirsögnum og titlum: notaðu alltaf ð, þ, æ og ö. Þetta er það sem fólk skrifar og leitar að.
• Í vefslóðum: umritaðu. gerviGreind verður gervigreind, þjónusta verður thjonusta. Slóðir með séríslenskum stöfum brotna í tenglum, tölvupósti og eldri kerfum.
• Í myndaskrám og skráarnöfnum: sama regla, umritaðu.

Tvö tungumál, sami viðskiptavinur

Íslendingur sem leitar að hversdagslegri þjónustu leitar á íslensku. Sami einstaklingur leitar oft á ensku um tæknileg efni, því hann er vanur að finna betri svör þar.

Í reynd þýðir þetta að þú getur átt tvo hópa fyrir sömu þjónustu. Ef þú átt ensku útgáfuna til þá skaltu hafa hana raunverulega þýdda, ekki vélþýdda, og með sínum eigin slóðum.

Lítið leitarmagn er ekki vandamál

Leitarorðatól sýna oft núll eða tíu leitir á mánuði fyrir íslensk orð, sem fælir fólk frá. Þessar tölur eru ónákvæmar fyrir lítil tungumál og þær segja ekki allt.

Þrjátíu leitir í mánuði á orði sem lýsir nákvæmlega því sem þú selur eru miklu verðmætari en þrjú þúsund almennar leitir. Ef helmingur þessara þrjátíu er í kauphugleiðingum þá er það raunverulegur rekstur.

Beinþýddur texti

Algengasta villan á íslenskum fyrirtækjavefjum er enskur taktur í íslenskum orðum. Setningar sem byrja á „Við erum stolt af því að bjóða“ eða „Í heimi þar sem“. Þetta er þýðing á markaðsensku og það heyrist strax.

Prófaðu að lesa upphátt. Ef þú myndir aldrei segja setninguna við viðskiptavin þá á hún ekki heima á vefnum.

Algengar spurningar