llms.txt og agents.md: skrárnar sem segja gervigreindinni hver þú ert

Robots.txt segir leitarvélum hvað þær mega skoða. llms.txt gerir annað: hún segir gervigreindarkerfum hver þú ert, hvað þú gerir og hvar réttu upplýsingarnar liggja, á hreinu og einföldu formi sem vél les auðveldlega.

Þetta er nýtt, staðallinn er enn í mótun og einmitt þess vegna er tækifæri. Á Íslandi eru þetta örfáir vefir sem hafa gert þetta.

Hvað fer í skrána

Skráin er venjuleg markdown-skrá sem liggur á galdrasmidjan.is/llms.txt. Hún á að vera stutt, rétt og laus við markaðsþvælu.

• Nafn fyrirtækisins og ein setning um hvað það gerir.
• Tengiliðaupplýsingar: netfang, staðsetning, svartími.
• Listi yfir þjónustu með hlekkjum og verði ef verðið er opinbert.
• Listi yfir mikilvægustu síður og greinar með einnar línu lýsingu.
• Athugasemd um hvað má og hvað má ekki fullyrða, til dæmis að verð séu án vsk og séu frá-verð.

agents.md

agents.md er sama hugmynd en ætluð gervigreindarumboðum sem heimsækja vefinn til að framkvæma eitthvað, til dæmis að finna opnunartíma eða panta. Í reynd má oft nota sama innihald í báðum skrám, sem er það sem við gerum.

Raunverulegt dæmi

Fyrir veitingastaðinn Kim Yong Wings settum við upp bæði llms.txt og agents.md, ásamt fullu Restaurant-schema með matseðli, einkunn og pöntunaraðgerð. Tilgangurinn er einfaldur: þegar einhver spyr gervigreind hvar hann fái kóreska vængi í Reykjavík þá á vélin að hafa réttar staðreyndir við höndina, ekki þriggja ára gamlar upplýsingar af einhverri annarri síðu.

Þrjár villur sem við sjáum

1. Að skrifa markaðstexta í skrána. Vélin þarf staðreyndir, ekki lýsingarorð.
2. Að gleyma að uppfæra hana þegar verð eða þjónusta breytist. Röng skrá er verri en engin.
3. Að halda að skráin ein og sér dugi. Hún hjálpar vélinni að rata, en efnið á vefnum þarf að standa undir sér.

Hvernig þú býrð hana til

Skrifaðu hana í textaritli, vistaðu sem llms.txt og settu hana í rót vefsins svo hún sé aðgengileg á vefslóð.is/llms.txt. Ef þú notar vefumsjónarkerfi getur þurft að setja hana inn sem staðreyndaskrá. Athugaðu svo að hún hlaðist í vafra.

Algengar spurningar