Vefverslun á Íslandi: allt sem þarf til að byrja að selja

Að opna vefverslun á Íslandi er einfaldara en flestir halda og flóknara en söluaðilar segja. Þú þarft fernt til að byrja: vörur með myndum og textum, greiðslulausn, sendingarleið og skilmála. Allt hitt getur beðið.

Greiðslulausnir

Á Íslandi eru nokkrir raunhæfir kostir og þeir kosta svipað. Munurinn liggur í uppsetningartíma, þjónustu og hvaða greiðslumátar fylgja.

Ráðið okkar: sæktu um snemma. Samþykktarferlið hjá greiðsluaðilum tekur oft lengri tíma en að smíða verslunina, og margir stranda þar.

Sendingar

Þetta er vanmetnasti hluti íslenskrar netverslunar. Viðskiptavinir velja oft afhendingu í pósthólf eða Dropp-box fram yfir heimsendingu, því það þýðir að þeir þurfa ekki að vera heima.

• Bjóddu að minnsta kosti tvo valkosti, helst þrjá.
• Sýndu sendingarkostnað snemma, ekki á síðasta skrefi. Falinn sendingarkostnaður er algengasta ástæða þess að fólk hættir við.
• Ókeypis sending yfir ákveðinni upphæð hækkar meðalkörfuna mælanlega.
• Landsbyggðin þarf sérstaka athygli. Ef sending út á land kostar margfalt meira segðu það strax.

Vörurnar sjálfar

Byrjaðu smátt. Tuttugu vörur með góðum myndum og alvöru textum selja meira en tvö hundruð vörur með myndum frá birgjanum og einnar línu lýsingu.

• Myndir: sama bakgrunnur, sama lýsing, sama stærð. Ósamstæðar myndir líta út fyrir að vera áhugamál.
• Textar: skrifaðu hvað varan leysir, ekki bara hvað hún er. Notaðu orðin sem fólk leitar að.
• Verð með vsk, alltaf sýnilegt.
• Lagerstaða sem er rétt. Að selja vöru sem er ekki til er dýrasta villan í netverslun.

Lögin, í stuttu máli

Þú þarft skilmála, persónuverndarstefnu og upplýsingar um skilarétt. Neytandi á almennt fjórtán daga skilarétt á netviðskiptum og þú þarft að upplýsa um hann áður en kaupin eru staðfest. Kennitala og heimilisfang seljanda eiga að vera sýnileg. Þetta er ekki flókið en það þarf að vera til staðar frá fyrsta degi.

Hvað þetta kostar í raun

• Smíði: 350.000 til 900.000 kr fyrir vandaða verslun með íslenskum greiðslulausnum.
• Greiðsluþóknun: 1,5 til 3 prósent af hverri sölu.
• Hýsing og viðhald: 10.000 til 40.000 kr á mánuði.
• Myndir og textar: annað hvort þinn tími eða 89.000 kr og upp úr ef einhver annar gerir það.
• Markaðssetning: reiknaðu með að þurfa hana. Vefverslun sem enginn veit af selur ekkert.

Fyrstu níutíu dagarnir

Fyrsti mánuðurinn: fáðu greiðslulausnina samþykkta, settu inn tuttugu vörur og opnaðu. Annar mánuðurinn: fylgstu með hvar fólk hættir við og lagaðu það. Þriðji mánuðurinn: bættu við vörum sem líkjast þeim sem seljast og byrjaðu að safna umsögnum.

Algengar spurningar