Spjallmenni sem svarar á íslensku: hvað virkar og hvað ekki

Spjallmenni hafa slæmt orðspor og það er verðskuldað. Gömlu kerfin voru byggð á föstum svörum og lentu í öngstræti um leið og einhver spurði eitthvað sem enginn hafði skrifað svar við.

Það sem hefur breyst er að nútímamállíkön skilja spurninguna í raun og þau tala ágæta íslensku. Vandinn er ekki lengur skilningur heldur agi: að tryggja að vélin segi aðeins það sem er satt.

Hvenær spjallmenni borgar sig

• Þú færð sömu tíu spurningarnar á hverjum degi: opnunartíma, verð, afhendingu, hvort þú þjónustir tiltekið svæði.
• Fyrirspurnir koma utan vinnutíma og fólk vill svar strax.
• Þjónustan þín er nógu flókin til að fólk viti ekki hvað það á að biðja um.
• Þú vilt vita hvað fólk er raunverulega að spyrja um, sem samtölin sýna þér svart á hvítu.

Hvenær það borgar sig ekki

• Þú færð fáar fyrirspurnir og svarar þeim öllum sjálf eða sjálfur á nokkrum mínútum.
• Málið er viðkvæmt eða persónulegt, til dæmis heilbrigðisþjónusta eða lögfræði.
• Þú átt ekki skýrar upplýsingar til að byggja á. Menni án staðreynda er bara nýtt vandamál.

Reglurnar sem gera muninn

1. Menni má aðeins svara út frá staðreyndum sem þú hefur sett inn. Ekkert almennt vit, engar ágiskanir.
2. Ef svarið er ekki til á það að segja það og bjóða samband við manneskju. Þetta er mikilvægasta reglan.
3. Aldrei skálda verð, tímasetningar eða loforð. Röng dagsetning í spjalli er raunverulegt tjón.
4. Manneskja á alltaf að vera í seilingarfjarlægð, með einum smelli.
5. Lestu samtölin vikulega fyrstu mánuðina. Þar sérðu hvað vantar í þekkingargrunninn.

Íslenskan

Nýjustu mállíkönin skrifa ágæta íslensku. Þau gera samt tvennt sem þarf að laga í leiðbeiningunum: þau verða of formleg og þau þýða enskan takt beint. Í reynd leysist þetta með því að skrifa skýrar leiðbeiningar um tóninn og gefa dæmi um svör eins og þú myndir orða þau sjálf.

Prófaðu líka með raunverulegum, óformlegum spurningum. Fólk skrifar ekki fullar setningar í spjalli, það skrifar „hvað kostar“ og „opið á laugard?“.

Hvað þetta kostar

Uppsetning fyrir lítinn rekstur er yfirleitt hálfs til eins dags verk, og rekstrarkostnaðurinn er nokkur þúsund krónur á mánuði fyrir venjulega umferð. Stærsta vinnan er ekki tæknin heldur að safna réttum svörum saman á einn stað.

Spjallmennið á þessum vef er dæmi um þetta. Það þekkir þjónustuna okkar, verðin og allar greinarnar, og ef þú spyrð um eitthvað sem er ekki í þeim upplýsingum þá segir það þér það og býður þér samband.

Algengar spurningar